Menyoal Barokah Dalam Rumah Tangga

Kagak terasa udah tahun 2015 aje (kate kalender masehi), nyoba mikir and merenung ape aje nyang udah terjadi tahun 2014 and tahun-tahun yang udah lewat, ternyate banyak banget waktu aye nyang aye sia-siain. Lagi mikir trus berkontemplasi (cie...kontemplasi ^_^) ujug-ujug keinget keluarga kecil aye (aye, istri ama anak), aye keinget ape bener aye udah jadi kepala keluarga nyang baek. Aye inget-inget dulu pas nikah banyak bener nyang ndoain aye ama istri semoga keluarganye jadi keluarga nyang dilimpahi Barokah ame Gusti Alloh...nah pas nginget-nginget ntu aye penasaran nieh ceritanye ape sieh arti kate Barokah ntu, akhirnya aye tanya dah ama mbah Google ape ntu artinye Barokah, ternyata Barokah ntu artinye (dari ni website ) secara ilmu bahasa, “al-barakah” berarti "Berkembang, bertambah dan kebahagiaan". Jadi dari ntu website singkatnye barokah ntu kebaikan nyang bertambah terus, nah aye terus mikir setelah aye berumah tangga ape iye kebaikan aye bertambah? Apa malah tetep aje kebaikannye, nambah kagak kurang juga kagak? Ato malah kebaikan aye jadi berkurang?

Setelah aye inget-inget ternyata aye termasuk nyang terakhir ntu, kebaikan aye dalam hal ini amalan-amalan aye kok jadi berkurang ye after having a little family (ceritanye make bahasa inggris), abis keinget itu aye langsung aje inget ama ayat di surat cinta Gusti Alloh tepatnye di surat Al-Muafiqun ayat 9 nyang artinye "Hai orang-orang yang beriman, janganlah hartamu dan anak-anakmu melalaikan kamu dari mengingat Allah. Barangsiapa yang berbuat demikian maka mereka itulah orang-orang yang merugi". Deg...langsung ketohok aye baca ayat ni, kadang aye sibuk maen-maen ama anak ama istri sampe ketinggalan sholat berjamaah, Ya Alloh ampuni aye... T_T

Abis itu aye lurusin niat, aye kuatin tekad, aye mau berubah, aye kagak mau jadi orang nyang rugi. Aye pernah baca katanye buat mbentuk kebiasaan cukup dijalanin tuh kebiasaan selame 21 hari klo kagak salah, makanye aye niatin and tekadin buat sholat wajib 5 waktu berjamaah, soalnye begitu aye inget lagi dulu nieh pas masih bujang Alhamdulillah aye bisa laksanain sholat 5 waktu jamaah di masjid, nah berarti kan abis nikah aye jadi kurang nieh amalan aye, makanye aye kuatin tekad numbuhin lagi kebiasaan ntu. Lagian kate psikolog anak katanye klo mau ngajarin kebaikan ama anak cara nyang paling baik and paling ngena ya kite kasih contoh/teladan ke anak kite, gitu katanye...ya udah, aye kan pingin anak aye jadi anak nyang soleh, ya kudunye kite as a parent give the best example, jadi klo kite pingin anak kite rajin ke masjid, ya kite selaku babenye kudu rajin ke masjid, ato klo kite pingin anak kite rajin baca Qur'an, ya kite juga kudu nyontohin rajin baca Qur'an juga...kira-kira begono lah.

Akhirnye, last but not least di akhir tulisan nyang alurnye kagak beraturan ini, aye pingin ngajak kite semue yuk kite kasih contoh ke anak kite nyang baek-baek, trus jangan sampe kayak nyang disebut di surat Al-Munafiqun ayat 9 ntu ye biar kite kagak jadi orang nyang rugi...and buat penutup aye keinget kata-kata sohib sekaligus nyang udah aye anggep guru aye "Kagak ade lu sorga ga rame coy..." (intinye fastabikul khoirot nyookkk...)

akhirul kalam Wassalamu'alaikum warohmatullohi wabarokatuh

ampe ketemu di tulisan berikutnye....cao... ^_^